Dioivo estrean ‘Ferro e Xenreira’, primeiro tema do seu novo EP. Escóitaa!

Dioivo, a banda viguesa de metal, vén de lanzar Ferro e Xenreira, novo sinxelo que será o primeiro adianto do seu novo EP, Dioivo III, que sairá da man do selo andaluz Darkwoods. Trátase da primeira canción nova que lanza o grupo dende xaneiro de 2019, se ben reeditaron o seu primeiro EP coa mesma discográfica alá por novembro de 2020.

A canción conta cunha colaboración de Marcos Rodríguez e Dana Lago, cantantes de Mileth, e o que vemos hoxe é unha versión sinxelo. Sairá, para Dioivo III, unha versión completa do tema.

Segundo a banda, contaban con poder presentar o tema nun concerto que ían dar pasado mañá na sala Rebullón, de Mos, pero a terceira onda do coronavirus fíxolles ter que cambiar os plans. Foi gravada xusto antes do confinamento, o cal interrompeu toda a gravación do EP.

Dioivo III foi gravado nos estudos Namek, en Vigo, e a banda promete un son moito máis cru que no disco anterior, Dioivo II. O tema xa pode escoitarse en todas as plataformas dixitais.

Déixanos contarcho!
Mantente ao día das nosas novidades uníndote agora á nosa lista de suscriptores.