Noemí Chantada triunfa no Festival de Cans

A curta 'Xoves de comadres' foi a gran galardonada desta singular edición, seguida por '16 de decembro' de Álvaro Gago

O Festival de Cans vén de pechar a súa 17ª edición cun palmarés que recoñece a mellor produción galega de curtametraxes do ano. A pesar das singulares condicións nas que se desenvolveu o certame, este foi no que máis películas se estrearon: un total de 15. Competían a concurso 25 filmes e 15 videoclips.

Xoves de comadres foi a gran gañadora da noite. Tras triunfar no Festival de Málaga, a curta da realizadora viguesa Noemí Chantada fíxose cos catro premios principais: Mellor curtametraxe de ficción, Premio do xurado dos veciños a mellor curtametraxe en imaxe real e Premio do público a mellor curtametraxe de ficción.

A segunda galardonada da noite foi 16 de decembro, de Álvaro Gago, colleitando os recoñecementos do xurado á Mellor Dirección e á Mellor Fotografía -por parte de Lucía C. Pan-.

Nos apartados interpretativos, Bruna Cusí -gañadora do Goya a Mellor Actriz Revelación con Verano 1993– fíxose co premio a Mellor Actriz por Todo el mundo se parece de lejos de Rafa de los Arcos, e Denís Gomez como Mellor Actor polo seu traballo en Mentres iso pasa de Nacho Ozores.

O resto de premiados polo xurado da sección de Ficción e Animación complétana Mario G. Cortizo, pola Banda Sonora de Conte Trencat de Miguel Gago, e Mellor Curta de Animación para El Gran Corelli, de Abel Carvajal.

Na sección Furacáns, Notas sobre a habilitabilidade en A Barca, do Colectivo Semente, levouse o premio á Mellor Curtametraxe de Non Ficción. Neste apartado, a cinta Usos e Costumes de Iria Silvosa obtivo unha Mención de Honra.

Por outra banda, a sección Novas Camadas incorporouse este ano para celebrar os traballos de creadores e creadoras noveis. A gañadora foi Onde durmen as gaivotas de Dani Cornes, con Mención de Honra a Toda Aspereza de Pablo Aguilar.

Pecha o palmarés ao premio o Premio ao Mellor Videoclip, outorgado a Rubén Domínguez pola realización de As Crónicas de Os Amigos dos Músicos. Adrián Canoura recibiu unha mención especial polo vídeo musical de Fisterra de Baiuca.

Déixanos contarcho!
Mantente ao día das nosas novidades uníndote agora á nosa lista de suscriptores.