O Sinsal volve á súa esencia con tres días de música na Illa de San Simón

A Illa de San Simón acollerá de novo o Festival Sinsal SON Estrella Galicia, que regresa este verán do 23 ao 25 de xullo. Logo dunha edición de resistencia, celebrada no litoral, neste 2021 o Sinsal volta a súa propia esencia como evento con tres xornadas de música e contacto coa natureza, con propostas singulares e contemporáneas, directos suxestivos e a illa como cabeza de cartel dun line up que é secreto ata que o público desembarca en San Simón. 

As músicas de vangarda e de raíz, manifestacións urbanas e sonoridades modernas ou con influencias electrónicas conforman a paisaxe sonora que propón este ano Sinsalaudio e que acompañará, ao longo de tres xornadas, ás asistentes desta edición, nomeada Sinsal Esencial. Unha escolma de artistas agóchase detrás do cartel dun festival que se desenvolverá os días 23, 24 e 25 de xullo en horario de tarde.

O cartel secreto do Sinsal Esencial non será a única sorpresa para o público que se achegue a este singular enclave das Rías Baixas. Este ano, cada banda e artista participante ofrecerá un único concerto nesta edición, polo que o programa de cada día será completamente diferente ao anterior. Nas vindeiras semanas, Sinsalaudio dará a coñecer outras novidades que permitirán poñer en valor tanto esta singular iniciativa musical coma o propio espazo natural no que se desenvolve. As entradas de SinSal SON Estrella Galicia sairán á venda nos primeiros días do mes de xullo.

Déixanos contarcho!
Mantente ao día das nosas novidades uníndote agora á nosa lista de suscriptores.